Әйгілі Top Gear бағдарламасы жабылды

BBC корпорациясы әйгілі Top Gear бағдарламасын эфирден алатыны туралы ресми мәлімдеме жасады. Себептері әлі белгісіз, бірақ 34-маусым шықпайтыны белгілі. Бағдарлама түсірілімі қауіпті деп танылды.

«Жанкүйерлер үшін шоудың аяқталуы көңіл түсіретін жаңалық екенін білеміз, бірақ бұл дұрыс шешім» деп BBC қысқаша мәлімде жасады. Корпорация жақын арада бұл шешім туралы кейбір ақпаратты жариялайды. Сонымен қатар шоуды жүргізген Эндрю Флинтофф, Пэдди МакГиннесс және Крисс Харриспен қоштасу ойларында жоқ. Олар жаңа жобаларға қатысады.

Британиялық бағдарламаның эфирден кетуі басқа елдердегі өзіндік нұсқасы бар Top Gear-дің қызметіне әсер етпейді. Сайт пен журнал да сол қалпында қалады.

Шоудың жабылуына негізгі себеп — 2022 жылдың желтоқсанында Суррей графтығындағы Дансфолд аэродромында түсірілім кезінде Эндрю Флинтоффтың апатқа ұшырауы. Оны ауруханаға тікұшақпен жеткізді және әлі толық айықпаған көрінеді. Бұл оқиға BBC үшін 11 миллион доллардан астам өтемақы төлеумен аяқталды деген де дерек бар.

New York Times таратқан ақпаратқа сүйенсек, апаттан кейін BBC түсірілім қауіпсіз екенін тексеру үшін тәуелсіз сарапшылар шақырған, бірақ тексеру нәтижесі жарияланбады. BBC ықтимал жазатайым оқиғалардан толық арылатындай жағдай жасағаннан гөрі әйгілі бағдарламадан бас тартқан арзан шығады деп шешім қабылдаған болар. Бір жағынан Top Gear көп табыс әкелетін бағдарлама саналады. 2015 жылға дейін BBC бағдарлама арқасында жылына 25 миллион доллар тапқан екен.

Осылайша болашақта шоу экстремал емес күйде көгілдір экранға қайта оралуы мүмкін. Түрлі апаттар мен оқиғалар Top Gear түсірілімі басталғалы бері қатарласып келеді. Ең ауыр деп сағатына 500 шақырым жылдамдықпен жүйткіген Vampire ракетомобиль түскен апатты атауға болады. Салдарынан Ричард Хаммонд екі апта комада жатты.

BBC 1977 жылы жүргізушілерге арнап шығарған Top Gear мәдени құбылыс атанды. Бағдарлама негізінен тұтынушыларға арналған және көбінесе шолу жасап, пайдалы кеңестер мен жол жүру қауіпсіздігіне қатысты мәлімет беретін. Шоу танымалдығының артуына үш жүргізуші ықпал етті. 2000 жылдардың басында жобаға келген Джереми Кларксон, Ричард Хаммонд және Джеймс Мэй бағдарламаға жаңа леп әкелді. Кларксон қатысқан бірнеше жанжалдан кейін 2015 жылы олар BBC-ден кетіп, артынша The Grand Tour шоуын шығарды. Сонымен қатар әр жүргізуші өз тележобасымен айналыса бастады.