9 мамырда Алматының орталық көшелері жабылады

Дәстүрге айналған «Батырларға тағзым» шеруі 9 мамыр күні таңертең басталады. Гоголь көшесіндегі Орталық саябақтан шыққан қатысушылар 28 гвардияшы-панфиловшы саябағына барып, гүл қояды.

Соған байланысты 7:00-ден 12:00-ге дейін Гоголь көшесінің Орталық саябақтан Қонаевқа дейінгі бөлігі толық жабылады. Қонаев — Жібек жолы — Қазыбек би — Бәрібаев арасында қозғалыс шектеледі. Мұндағы тұрақтар да жұмыс істемейді. Бұл уақытта жол шетіне көлік қоюға болмайды.

21:00-де Республика сарайының маңында дрондар шоуы басталады. Оны тамашалау үшін Абай алаңынан, «Қазақстан» қонақ үйінің, Caspian University-дің қасынан және Абай даңғылының Назарбаевтан Достыққа дейінгі бөлігінен орын бөлінеді.

Халықтың қауіпсіздігі үшін 18:00 мен 21:30 аралығында Абай даңғылының Назарбаевтан Достыққа дейінгі, Достық даңғылының Құрманғазыдан Сәтбаевқа дейінгі бөлігінде машина жүрмейді. Жүргізушілер бағытын алдын ала жоспарлағаны жөн.