500 км/сағ межесін алғаш болып Қытай көлігі бағындыра ма?

2025 жылы BYD концернінің 3019 ат күшіне ие Yangwang U9 Extreme электрлі гиперкары 496.22 км/сағ жылдамдықпен жүйіткіп, Bugatti Chiron Super Sport 300+ моделінің көрсеткішінен (490.5 км/сағ) асып түскен. Бірақ қытайлық инженерлер U9 мүмкіндігін толық пайдалана алмады деп есептеп, тағы бір сынақ өткізуге бел буған.

CarNewsChina хабарлағандай, BYD вице-президенті Стелла Ли командаға Германиядағы Папенбург сынақ полигонында қайта сынақ жүргізуге рұқсат берілгенін айтты. Оның айтуынша, биыл күзде Yangwang U9 жылдамдығы 500 км/сағ межесінен асып, мұндай нәтижеге қол жеткізген әлемдегі алғашқы сериялы автомобиль атануы мүмкін.

Айта кетейік, 500 км/сағ межесін бағындыру бәсекесіне Koenigsegg те қатысып жатыр. Симуляциялық есептеуге сәйкес, шведтік Jesko Absolut гиперкары бұл көрсеткішке қол жеткізе алады, бірақ сынақ нақты қашан өтетіні белгісіз.