Демалыс маусымында қазақстандықтар Ресейге көлікпен баруды жоспарлайды. Бірақ биыл 30 маусымнан бастап теріскейдегі көршіміз жаңа талап енгізеді. Ресейге визасыз кіре алатын шетелдіктер (соның ішінде Қазақстан азаматтары) Ресейдің Бірыңғай сәйкестендіру және аутентификация жүйесінде тіркелуі керек. Кейін шекарада ruID мобильді қосымшасындағы электронды өтінімді көрсетеді.
Міндетті түрде тіркелу керек пе?
Ресей билігі визасыз кіретін азаматтарға арналған жаңа тіркеу процедурасын әзірге тек тәжірибе ретінде енгізіп отыр және Қазақстан мен Ресей арасындағы визасыз режимге әсер етпейді. Ресейдің Қазақстандағы елшілігі азаматтар өтінімді өз еркімен толтырады деді. Яғни, тіркелу әзірге міндетті емес, бірақ жаңа ереже бойынша бәрін алдын ала рәсімдеп алған дұрыс.
Қосымшаны қайдан жүктеп алуға болады
Қосымшаны App Store, Google Play, RuStore және AppGallery-ден жүктеп аласыз. Өтінімді Ресейдің «Госуслуги» сервисінде де толтыруға болады. Егер «Госуслугиде» аккаунтыңыз болса, ruID қосымшасына сол логин мен құпиясөз арқылы кіресіз.
Қашан өтінім беру керек
Ресейге кірместен 90 күн немесе кем дегенде 72 сағат (үш тәулік) бұрын өтінім беру қажет. Шұғыл түрде бару керек болса шекарадан өтерден 4 сағат бұрын беруге болады. Егер шекарадан өтуге 72 сағаттан аз уақыт қалса, өтінімде шұғыл кіру себебін көрсетіп, растайтын құжаттарды қоса тіркеу қажет. Бұл құжаттарды шекарада қайта көрсетудің қажеті жоқ.
Шұғыл кіруге негіз болатын жағдайлар:
- отбасы мүшесінің немесе жақын туыстың (ата-анасы, жұбайы, баласы, атасы, әжесі, немересі,
іні-қарындасы) қайтыс болуы; - өтініш берушінің науқастануы;
- өтініш берушінің емделуі.
Өтінімді қалай толтыру керек
- ruID қосымшасына «Госуслугидегі» логин мен құпиясөз арқылы кіріңіз. Аккаунтыңыз болмаса, тіркеліңіз. Тіркелген кезде Ресей шекарасынан өтетін құжатыңыздың деректерін көрсетіңіз.
- ruID қосымшасының басты бетіндегі «Сапарды электронды авторландыру» бөліміндегі өтінімге өтіңіз.
- Мына деректерді жазыңыз:
- шекарадан өтетін құжаттағы деректер;
- баратын өңірлер;
- сапар мақсаты;
- Ресейде қалу мерзімі;
- сізбен бірге бара жатқан балалар туралы мәлімет.
- Биометрия деректерін, яғни бет әлпетіңіздің фотосын, паспорт суретін және дауысыңызды жазып жіберіңіз. Балалар үшін биометрия тапсырудың қажеті жоқ.
Сіз берген ақпарат автоматты түрде тексеріледі. Сізге қатысты қандай да бір шектеу болса, қосымшада Ресейге кіруге тыйым салынғаны туралы ақпарат шығады.
Биометрия деректерін бірыңғай жүйеде тіркеуді аяқтау үшін Ресейге барған соң 10 күн ішінде жеке басыңызды куәландыратын құжатпен банк бөлімшесіне барасыз.
Сәт сапар!
Комментариев: 0