3.1 млн теңге тұратын кроссовер. Үндістанда Tata Punch жаңарды

Үндістан автоөндірушілері қарапайым халыққа арналған арзан әрі қызық модельдер шығарып келеді.

Солардың бірі — ұзындығы небәрі 3.82 метрлік Tata Punch субкомпакт кроссовері. Көлік жарықдиодты оптика, астын қорғайтын пластигі бар ірі бампер алды. Клиренсі 193 мм ұлғайды.

1 / 5

• 
• 
• 
• 
• 

1 / 5

Punch бұрынғыдай 87 ат күшін беретін 1.2 литрлік атмосфералық мотормен жабдықталады. Оның сұйытылған газбен жұмыс істейтін нұсқасы да бар. Агрегат механика немесе автоматпен жұптаса жұмыс істейді. Рестайлингтен кейін Nexon моделінен алған 118 ат күшіне ие 1.2 литрлік турбомотормен жүретін модификациясы пайда болды.

1 / 7

• 
• 
• 
• 
• 
• 
• 

1 / 7

Машинаның интерьері жаңарды. Алдыңғы панельдегі 10.25 дюймдік сенсорлы мультимедиа дисплейі мен 7 дюймдік аспаптар панелі жаңа рөлмен үйлесіп тұр. Ортаңғы консольдегі климат-бақылау экраны сенсорлы. Матамен қапталған орындықтары ыңғайлы. Жүргізуші көмекшілері жоқ, бірақ стандарт комплектацияда алты қауіпсіздік жастығы бар. Жабдықтар тізіміне айнала шолу камерасы, люк, сымсыз қуаттағыш және сегіз динамикті аудиожүйе кіреді.

Компания Tata Punch-қа тапсырыс қабылдап жатыр. Base түрленімінің бағасы 5.59 лакхтан (~3.15 млн теңге) басталады, үздік Accomplished+ S нұсқасы 10.54 лакх (~5.95 млн теңге) тұрады. Сегменттегі басты бәсекелестері — Suzuki Ignis, Hyundai Exter, Citroen C3, Renault Kiger және Nissan Magnite.