2 %-дық автокредит туралы ақпарат жалған

Әлеуметтік желіде «АвтоЖол+» бағдарламасы іске қосылды, мемлекет көлік құнының 10-50 %-ын субсидиялап, небәрі 2 %-бен несие беріп жатыр, тіпті бастапқы жарнаның керегі жоқ деген мәндегі мәлімет тарады.

Өнеркәсіп және құрылыс министрлігі бұл шындыққа сай келмейді, хабарландыру жалған және алаяқтық мақсатта жазылған болуы мүмкін деп мәлімдеді.

«Министрлік азаматтарды сақ болуға, күмәнді сілтемелерге өтпеуге, жеке деректерін тексерілмеген сайттарда енгізбеуге, сондай-ақ тек ресми дереккөздерде жарияланған ақпаратқа сенуге шақырады. Сақ болыңыздар, тек ресми ақпаратқа сеніңіздер!» — деп жазды ведомство.