Kolesa.kz сайтында 1974 жылғы Ford Taunus сатылады. Екі есікті көліктің бағасы бірден назар аудартады. Ескі машина 41 млн теңгеге бағаланып отыр. Аз сома емес. Мұндай ақшаға жол жүрген «Тесла» Model Y немесе Model 3 сатып алуға болады. Неге электромобильмен салыстырып отырмыз? Өйткені Taunus та электрлі.
Хабарландыруда көліктің Шымкенттегі Beren Motors фирмасында өзгертілгені жазылыпты. Ол 300 ат күшін беретін электромотормен жүреді, жүріс қоры — 300 шақырым. Батареяны толық қуаттауға 8 сағат қажет.
«Таунустың» шанағы қара түске боялып, алдыңғы оптикасы сәнді тормен жасырылған. Купеге 70 жылдардағы машина үшін барынша үлкен төмен профильді шинасы бар дөңгелек орнатыпты. Салоны былғарымен қапталған.
Ford Taunus-тың динамикалық сипаттамасы туралы ақпарат жарияланған жоқ.
Taunus шымкенттік шеберлердің алғашқы жобасы емес екенін айта кеткен жөн. Олар бұған дейін де іштен жанатын қозғалтқышы бар көліктерді электромобильге айналдырған. Солардың қатарында біздің әріптесіміз Олжас Оқастың қатысуымен жасалған Chevrolet Damas бар.
Комментариев: 0