1970 жылдарды еске салатын Range Rover

Эстонияның Velvet Motorworks ательесі үшінші буындағы Range Rover-ге арналған ерекше әрлеу бағдарламасын ұсынды. Шеберлер машинаға заманауи технология қолдана отырып ескіше әрлеп, ең көне «рейндж» бейнесіне келтірмек. Жоба рендер түрінде тұр, бірақ оған қазір тапсырыс беруге болады.

1 / 5

• 
• 
• 
• 
• 

1 / 5

Ателье L322 буынды Range Rover-дің алдыңғы бөлігін 1970 жылдардағы стильге сай әрлейді. Жол талғамайтын көлік ерекше капот, жаңа радиатор торы, арнайы бампер және диодты жарық техникасымен ерекшеленеді. Биік клиренс пен жолсызға арналған дөңгелек көліктің сұлбасына ретро сипат қосады.

Тюнерлер интерьер суретін жариялаған жоқ. Бірақ салон жабдықтары мен қаптамасын ауыстырып, медиажүйе сияқты жаңа технология орнататыны белгілі.

Velvet Motorworks жобаға негіз ретінде 400 ат күшіне ие 4.2 литрлік V8 моторымен жүретін Range Rover-ді ғана пайдаланады. Ателье қозғалтқыш үшін жаңа бағдарламалық жасақтама әзірлеп, ауыспалы клапаны бар балама газ шығару жүйесін орнатады.

Мұндай Range Rover-дің алғашқы прототипі 2026 жылдың ортасында жарық көреді, сериялы өндіріске бірнеше айдан кейін шығады. Ателье мұндай жол талғамайтын көлікті тек тапсырыс бойынша шекті мөлшерде құрастырады.