Италиялық автомобиль порталдарының бірінде көп жүрмеген УАЗ-469 сатуға қойылды. Ең алдымен машинаның бағасы назар аудартады. 34 жастағы жол талғамайтын көлік 18 мың еуроға (8.9 млн теңге) сатылады. Қазақстанда мұндай ақшаға автомат қорабы бар жаңа UAZ Patriot алуға болады. Оның бағасы 8.5 миллион теңгеден басталады.
Көлік сырттай КСРО-да сатылған әдеттегі «469»-ға ұқсамайды. Біріншіден, УАЗ-да өзгеше графика қолданылған, екіншіден, ол жұмсақ материалдан жасалған төбесі, дөңгелек аркасы, басқа айна және алдыңғы бамперімен ерекшеленеді. Бұл Италияда кеңестік көліктерді насихаттайтын ағайынды Мартореллилердің зауытында жасалған УАЗ.
Марторелли жасаған машиналар мен кеңестік көліктердің айырмашылығы сыртқы пішінінде ғана емес. Кейбір нұсқаға басқа мотор орнатылады. Біз сөз етіп отырған машинаға 75 ат күшін беретін 2.5 литрлік дизельді Peugeot XD3 қойылған. Ол 4 сатылы механикамен жұмыс істейді. Сонымен қатар топтамада Марторелли жасаған 100 ат күшіне ие турбодизель мен 112 ат күшіне ие 2 литрлік бензинді Fiat моторы бар.
Суреттен машинаның жақсы сақталғанын байқауға болады. Иесінің айтуынша, одометр 67.5 мың шақырым ғана көрсетіп тұр, оның үстіне кейінгі кезде көлік жылына 200 шақырымнан артық жол жүрмеген.
Комментариев: 0