1600 ат күшіне ие Brouillard — эксклюзив Bugatti

Өте қымбат әрі сәнді гиперкарларымен танымал Bugatti жаңа моделін ұсынды. Ол Brouillard деп аталады және Bugatti-дің бірегей машина жасайтын Solitaire атты жаңа бағдарламасының алғашқы өнімі. Суперкар W16 қозғалтқышы бар Chiron платформасына негізделгенімен, өзіндік дизайнымен ерекшеленеді.

1 / 15

• 
• 
• 
• 
• 
• 
• 
• 
• 
• 
• 
• 
• 
• 
• 

1 / 15

Bugatti Brouillard-тың сырт келбеті W16 Mistral родстеріне ұқсайды, бірақ қатты шатырмен жабдықталған. Бренд гиперкардың дизайн элементтері жаңа және арнайы жасалған деді. Радиатор торы ірі ауа өткізгіші бар бампермен және ерекше оптикасымен үйлесіп тұр. Көліктің C тәрізді пішіні ұзарған, дөңгелек аркасы жақсарған, созыңқы артқы жағында «үйрек құйрығы» стиліндегі қанат пайда болды.

Интерьері Парижде тоқылған сұр-жасыл реңкті мата, былғары, алюминий және көміртекті талшықпен қапталған. Салон дизайнында жылқы бейнесі жиі кездеседі, бұл Этторе Бугаттидің сүйікті сәйгүлігі Бруйярға сілтейді. Есіктегі кестелеп тігілген жылқыдан бөлек, трансмиссия селекторының тұтқасына да ат мүсіні орнатылған. Орындықтар гиперкар иесінің денесіне дәл келетіндей етіп жасалған.

1 / 4

• 
• 
• 
• 

1 / 4

Bugatti Brouillard 1600 ат күшін беретін 8 литрлік W16 қозғалтқышымен жабдықталған. Динамикалық сипаттамасы әлі жарияланбады.

Solitaire бағдарламасы Bugatti-ді аса сәнді шанақ ательесіне айналдырғандай. Компания бұрыннан бар платформа мен моторға негізделген машиналар жасамақшы. Rolls-Royce осындай әдісті бірнеше жылдан бері қолданып келеді. Әдетте мұндай көлік иелері өзін көрсетпейді, бірақ Brouillard әлемдегі ең ірі Bugatti коллекциясының иесі Мишель Перридонға тиесілі екені белгілі. Гиперкардың бағасы белгісіз, дегенмен кейбір дерекке сүйенсек шамамен 30 миллион доллар тұрады.